Til baka

Áreynsluþvagleki

Hvað er áreynsluþvagleki?

Áreynsluþvagleki er ósjálfráður þvagleki við líkamlega áreynslu, hósta eða hnerra.  Algengustu orsakir áreynsluþvagleka eru slappir grindarbotnsvöðvar. Áreynsla eins og að hósta, hoppa, hlaupa, hlæja og lyfta þungu getur valdið leka hjá báðum kynjum.

Þvagleki er algengari hjá konum, þar sem þær hafa styttri þvagrás og víðari mjaðmagrind en karlar og þar með er grindarbotninn sem vöðvarnir þurfa að loka stærri. Auk þess veikja leggöngin vöðvaskálina og það álag sem fylgir meðgöngu og áhrifum tíðarhvarfa á grindarbotninn gerir það að verkum að áreynsluþvagleki er mun algengari hjá konum, sérstaklega á barneignaaldri.